Ný forgjöf

Nú er GR búið að uppfæra forgjöf meðlima GR samkvæmt tilkynningu frá því í gær. Allavegana er búið að hækka mig upp um 20%.  Þetta er væntanlega í samræmi við getu þ.a. þetta er líklega eðlilegt. Þá er bara að keyra hana niður í sumar, ekki spurning. Hvað finnst mönnum um þetta?

Emil

Kynning á félögum Nafnlausa Golffélagsins

Þar sem það eru ekki nema 6 dagar í fyrstu umferð mótsins þá er við hæfi að kynna meðlimi félagsins.

Þetta er bara það sem þekkist hjá öllum stórklúbbum eins og okkar um alla evrópu.

 

 Aron Hauksson er formaður félagsins og aðaldriffjöður.

Það er spurning hvað gerist hjá honum í sumar. Aron er búinn að vera í æfingarbúðum á Flórida. Líklega fáir í félaginu sem hafa lagt eins mikið í undirbúningstímabilið bæði fjárhagslega og andlega. Þá hefur Aron breytt um mataræði til að koma enn betur undirbúinn fyrir leiktímabilið og verður áhugavert að sjá hvort allt þetta skili sigrum í sumar.  

 

 

Benedikt Hauksson er ókrýndur veislugjafi félagsins.

Benni mun líklega vinna ófáa leiki í sumar með því að hóta að birta myndir af mönnum á lokahófi félagsins síðasta haust. En þar hélt hann eina glæsilegustu veislu í manna minnum. En það er ekki spurning á Benni á eftir að taka fleiri sigra vegna hæfileika sinna sem golfari. Þetta tvennt gæti verið hættuleg blanda í sumar.

 

Sveinn Ingvarsson stjórnarformaður Burgernefndarinnar ásamt að sitja í stjórn Shootout nefndarinnar. 

Denni er einn af þessum leikmönnum sem getur komið á óvart í sumar og má jafnvel segja að hann sé X-factor því maður veit aldrei hvað gerist hjá honum. Margir hafa fallið fyrir sakleysissvipnum og ekki áttað sig á því að hafa tapað leiknum fyrr en á 18 gríni.

Stórhættulegur leikmaður.

Emil Hilmarsson formaður ferðanefndarinnar.

Einn af þessum leikmönnum sem kemur alltaf á óvart með leik sínum. Býr yfir miklu jafnaðargeði á vellinum, sem oftar en ekki hefur reynst andstæðinum hans skeinuhætt. Hefur einnig sýnt gífurlega skipulagshæfileika í ferðum félagsins sem formaður ferðanefndar. Heyrst hefur að Emil ætli sér stóra hluti í sumar og hefur hann hæfileikana til að standa við þau stóru orð.

 

Guðlaugur Einarsson Wild man

Gulli er óútreiknalegur golfari, því andstæðingar hans vita ekki alveg hvar þeir hafa hann. Högglengd hans er mikil þó svo að kúlan fari ekki alveg beint þá flýgur hún mjög langt. Einn af þessum leikmönnum sem gæti náð mjög langt.

 

 

Heimir Freyr Hálfdánarson túlkur félagsins.

Heimir er mjög sterkur einstaklingur sem hefur mátt þola ýmislegt á sínum golfferli. Hann hefur ítrekað komið "aftur" og unnið leiki sem hefðu átt að vera tapaðir. Það verður gaman að fylgjast með Heimir í sumar. Þeir sem hafa áhuga geta skráð sig á lista til að vera kaddý fyrir Heimir. 

 

Ingi Ólafsson Ironman

Ingi hefur gífurlegt keppnisskap og gjörsamlega neitar oft að viðurkenna að holan sé töpuð.  Þetta sama skap hefur fært honum nokkra sigra í gegnum tíðina. Mjög rólegur og yfirvegaður á leikvelli. Ingi er áhugaverð blanda af keppnisskapi, rólegheitum og yfirvegun. Það gæti allt gerst hjá honum í sumar.

 

Ingi Þór Hermannsson stúdentinn

Ingi Þór kemur til með að vera stóra spurningamerkið í sumar, ekki vegna hæðar sinnar. Heldur vegna þess að hann settist á skólabekk fyrir nokkru og er að klára þann pakka. Það þarf ekkert minna en MBA nám til eiga möguleika á að verða formaður félagsins. Hann hefur verið á hraðri niðurleið forgjafalega séð síðustu ár.

Spurning hvað gerist í sumar.

Magnús Ingi Stefánsson Varaformaður, situr í stjórn ferðanefndar

Maggi er líklega sá eini sem hefur hækkað í forgjöf á milli ára. Hann er mjög stórhuga og ætlar sér langt í golfinu en hefur einhvern veginn ekki náð að fylgja því eftir. Stefnir á túr eldri kylfinga (LEK) og ætlar sér stóra hluti þar.

Já, hann er alltaf með svokallaðann farandbikar félgsins.

 

Ólafur Hafsteinsson Fylkismaður Nr.1

Óli hefur gífurlega reynslu sem íþróttamaður sem hefur skilað flestum hans sigrum í gegnum tíðina. Hann veit ekki hvað hræðsla er á leikvelli og tæklar allar aðstæður eins. Hans stíll er ekki varnarsinnaður heldur ávallt sókn. Þetta sumar gæti orðið áhugavert hjá Óla þar sem hann mætir til leiks með nýtt Ping sett.

 

Samúel Ingi Þórarinsson Grafískur hönnuður félagsins

Sammi á heiður af lógói félagsins, snilldarmerki. Fimm tré Samma er alltaf jafn ógnvekjandi og eru ekki allir meðlimir sáttir við það. Þar sem hann slær jafnlangt með því og hinir með driver. Sammi fór holu í höggi í fyrra á Korpu.

 

 

Sveinn Ásgeir Baldursson Yfirstílisti og grínari

Svenni er snilldargolfari og margt annað til lista lagt en bara að spila golf. Hann er líklega sá golfari í hópnum sem notar sálfræði markvisst á andstæðinga í upphafi leiks. Líklega eru fáir eða enginn í hópnum sem á jafnmargar medalíur, að hans sögn. Þá eru fáir jafn glæsilegir á velli og Svenni og það eitt á eftir að skila honum nokkrum sigrum í framtíðinni.

Gæti orðið hans sumar.

 

 

 

 

 

 

Niðurstaða æfingahrings

Þá er æfinga hringnum lokið og aðal fundinum.

Blíðskaparverður var í Grafarholtinu í gær og stóðust engar veðurspár í þetta skiptið.

Heyrðist á mönnum að spilamennskan hafi verið ágæt hjá flestum, gaman væri að fá comment hvernig mönnum gekk.

Ánægjulegt var að allir meðlimir mættu til leiks í þetta skiptið og gaman væri að endurtaka það sem oftast.

Aðalfundurinn var haldinn eftir spilamennskuna og kemur ítarleg greinargerð frá ritara fundarins síðar.

Sjáumst svo hressir í sumar.

Formaðurinn.

Æfingarhringur.

Sælir félagar

Þá er komið að æfingahringnum hjá okkur, hann mun EKKI telja í mótinu, en notum hann til að koma okkur saman og verðum svo með aðalfundinn á eftir, þar sem línurnar verða lagðar.

Stefnan er að spila á morgun þriðjudag, þar sem einhverjir vilja horfa á æfingarleikinn sem er á miðvikudaginn, ég mun reyna að fá rástíma í Grafarholtinu.

Í ljósi þess hvað bloggið hefur ekki verið að gera sig síðustu vikurnar ásamt því að menn hafa kvartað aðeins undan því að sumir vinnustaðir eru lokaðir á blogg, ásamt því að sumir hafa kvartað yfir því að hafa ekki þekkingu á bloggi þá held ég að best sé að menn svari bara tölvupóstunum og ritstjórinn mun svo setja inn það sem skiptir máli inná bloggið, til frekari varðveislu.

Ég vil því biðja menn um að svara þessum pósti um það hvort þeir komist á morgun, ég mun reyna að fá rástíma uppúr klukkan 5, má því gera ráð fyrir að fundurinn verði um 9:30.

Í fyrramálið mun ég senda út nánari staðfestingar á tíma og stað.

Formaðurinn 

Fyrsti leikdagur

Þá er komið að fyrsta leikdegi.

Vegna leiks mu-cfc, næstkomandi miðvikudag 9. mai þá færum við til leikdaginn og spilum þriðjudaginn 8. mai.

 Þennann leikdag spilum við æfingarhring og telur hann því í mótinu okkar, í beinu framhaldi af spilamennskunni þá verður aðalfundurinn haldinn þar sem við munum leggja línurnar fyrir sumarið.

Ég mun bóka rástíma annaðhvort á Korpunni eða Holtinu, þar sem það opnar um helgina, grunar samt að Korpan sé aðeins betri.

 Verðum í bandi í næstu viku.

Formaðurinn.

Stutt í golfvertíðina

 

Nú styttist í opnunarmót Korpunnar og því þarf að huga að starfi sumarsins.

Korpan mun opna þriðjudaginn 1. mai og eru nokkrir meðlimir félagsins nú þegar búnir að skrá sig á opnunarmótið, vil ég óska þeim góðs gengis í því.

Vegna leiks AC-Milan og mu, þá hefjum við ekki leik miðvikudaginn 2. mai, en fyrsti leikdagur og aðalfundurinn verða haldinn miðvikudaginn 9. mai á Korpunni, hvet ég alla til að mæta.

Á aðalfundinum verður að ákveðið hvaða leikfyrirkomulag verður í sumar, formaður lokahófsnefndarinnar valinn, fjölgun í félaginu, enginn meðlimur hefur tilkynnt inn nýja meðlimi, önnur mál borin upp af félagsmönnum.

Ég vil biðja félagsmenn um að staðfesta lestur þessa skeytis, einnig eru flestir sem eiga eftir að skila inn ítarlegum upplýsingum um sig til ritstjóra síðunnar.

Muna svo að standa með Liverpool mönnum á þriðjudaginn kemur. 

Formaðurinn.

 

Golf, golf og aftur golf.

Sælir félagar

Nú á sumardaginn fyrsta er best að fara að leggja drög að sumarstarfi félagsins.

Gaman væri að fá sögur frá félagsmönnum um það hvernig þeir eru búnir að æfa í vetur og vor og hvort einhverjar golfferðir hafi átt sér stað og hvert var farið og fá nokkrar frægðar sögur í umræðuna, fótbolta sögur mega einnig fylgja með þar sem menn segja frá fótbolta ferðum vetrarins, já og svo einhverjar veiðisögur ef þær eru krassandi.

Við munum hefja formlegt starf félagsins um leið og vellirnir opna og verðum með fyrsta æfingar hring eins snemma og hægt er og svo aðalfund þar strax á eftir.

Eins og ég hef nefnt áður, þá verðum við aðeins að hvíla holukeppnina og tökum því upp punkta keppni þetta árið.

Mín tillaga er að reyna að hafa þetta í einföldustu mynd og í hverri viku spilum við holukeppni og látum X marga hringi gilda yfir sumarið og sá sem hefur flesta punkta í lok móts verður sigurvegarinn, stefnan verður þó að sjá til þess að Maggi sigri ekki enn eitt árið, sama hvaða brögðum við beitum til þess.

Vil einnig loksins setja burgerinn á þetta vorið og munum spila hann sem tveggja hringja mót á Hellu einhvern laugardaginn mjög fljótlega og fáum okkur svo burger og öl í framhaldi af því.

Síðan er það shoot out mótið sem við spilum seinnihlutann í júní.

Ég legg til að við spilum á miðvikudögum eins og undanfarin ár, en þó með þeirri undantekningu að ef leikir eru í meistaradeildinni þá flytjum við umferðina yfir á fimmtudag.

Lokahófið verður svo í lok móts og þurfum við sjálfboðaliða í að sjá um það, formaður lokahófsnefndarinnar er alráður um skipulag og dagsetningar hófsins og er því um mikil völd að ræða, sem menn verða að nýta sér vel.

Hvað fjölgun í félaginu varðar þá held ég að sé best að menn fara að kynna þá menn sem sækjast eftir inngöngu þannig að við fáum einhverja tilfinningu fyrir því hvort einhver ásókn er í félagið, ég myndi segja að hver félagsmaður megi kynna til einn nýjann meðlim og svo þarf nefndin að samþykkja þá sem sækja um.  Þær upplýsingar um umsækjendur verða að vera hver maðurinn er, hvaða kosti hann hefur yfir ráða, og svo hvaða forgjöf hann er með og hvaða forgjöf hann spilar á, við erum sð sækjast eftir mönnum sem hafa óbilandi áhuga á golfi.

Nú erum við komnir með nýja blog síðu þar sem allir geta bætt inn fréttum inná síðuna, slóðin er http://nafnlausu.blog.is, það er hann Maggi sem er ritstjóri síðunnar og mun ritskoða allt sem þar fer inn, það er líklega best að hann komi með smá kennslu um það hvernig við setjum inn fréttir og þær siðareglur sem við fylgjum eftir.

Nú þar sem menn eru ekki að keppa við einhvern annann og því ekki beint um leikskýrslu að ræða þá væri samt gaman að skrifa inn leikskýrslu um það hvernig hinum leikmönnunum gekk á hringnum og reyna þá að finna bestu og verstu tilþrifin á gamansaman hátt og hvet ég menn til að leggja til eins margar leikskýrslur og hægt er, allir geta svo sett inn comment á aðrar leiksksýrslur og við verðum að reyna að fá stemmningu utan vallarins með í þetta.

Mig langar að biðja menn um að senda á ritstjórann mynd af sér sem hann setur inn á netið og einnig að yfirfara eigin upplýsingar og þá sérstaklega forgjöfina þannig að við getum haft record yfir forgjöf allra félagsmanna.

Við getum ekki gert þetta að flottustu golf síðu landsins nema að félagsmenn taki þátt í að skapa hana.

Svona í lokin langar mig að óska manutd félögum til hamingju með ensku deildina, en í ljósi þess að Liverpool þarf aðeins að sigra Chelsea og AC Milan í meistaradeildinni áður en þeir lyfta dollunni þá sé ég ekki hverjir geti hindrað þá í stærstu og skemmtilegustu keppni ársins.

Með von um góð viðbrögð og góða umræðu og gott golfár.

Með kveðju

Aron Hauksson

102 ára fór holu í höggi

Það er greinilegt að golfarar geta haldið í vonina með að fara holu í höggi samkvæmt frétt á kylfingur.is.

Vill benda nokkrum félögum mínum í Nafnlausa Golffélaginu að halda áfram að reyna........... aldrei að vita nema sá sami komist í spjallþátt hjá Hemma Gunn.

Sammi átti reyndar eitt af þessum snilldarhöggum síðasta sumar á 6 holu á Korpu.

 

Golftímabilið 2007.

Nú ættu allir félagar Nafnlausa Golffélagsins að vera búnir að fá tilkynningu um blogg síðuna okkar.

Ég er viss um að þeir sem munu fylgjast með síðunni okkar í framtíðinni vilji vita hvernig standi á þessu "frumlega" nafni og það er öruggt að það mun aldrei koma í ljós.

Nú fer að styttast í aðalfundinn þeas. fyrsta hringinn okkar þar sem tekið verður á komandi tímabili og breytingartillögum. Ef að Ingi Ólafs er með einhverjar tillögur þá held ég að hann ætti að fá einhvern annan en sjálfan sig til að bera þær upp.

Ef ég man rétt kom hann með "að minnsta kosti" 7 breytingartillögur á síðasta ári sem voru allar felldar. Þó svo að menn væru sammála um að þær hefðu verið mjög góðar og þarfar tillögur frá kallinum.................. .

Svona í lokin vill ég óska Zach Johnson til hamingju með sigurinn á Masters.

 

P.S.

Endilega að svara skoðunnarkönunni. Eins og í öllum félögum þá eru það bara virkir félagar sem geta kosið, eða þannig.

Nafnlausa Golffélagið VS. Brassarnir - 2006

Þær sem félagar Nafnlausa Golffélagsins fóru frekar ílla út úr viðureigninni þetta árið var ákveðið að setja ekkert á prent => engar leikskýrslur.

Nafnlausa Golffélagið gaf veglagann farandbikar sem keppt verður um hér eftir.

 

Ef menn hafa ekki skilið textann fyrir ofann þá unnu Brassarnir aftur og áttu það skilið eftir frábæra spilamennsku